كلهن سولفتهن .. لو بعد منهن ؟!
شد عيوني بعصابه
واخذني مغمض اندلهن
واندل وين مضمومات واعرف ليش دافنهن
مثل شايب خلص عمره
وبقى بعود الصبا يدندن
انا كلما الوذ بهالتقيه واضحك وي الناس
دمعاتي علي تفتن
شفت قصر الاماره .. ويم عبيد الله ..
تلاكه المستحيل هناك والممكن
الجسد علكاع والراس بطشت
والجامع يأذن ..
وصدى ذيج الشتايم من حرب صفين
من فوك المنابر واذني تسمعهن
ومن طعنة علي الفجر بالمحراب
اجن من السما معزيات
والنجمات دمن بالطم خدهن
ودخان المخيم بعد جواه نار
من طبع الجروح التعتك تخزن
لما نسأل التاريخ .. ياهو التستحي منهن ؟؟!
يدفن راسه بجفوفه
يكول هواي بجني وسجلهن ضاع .. ومضيع دفاترهن
عدا ذيج الاجساد الطاهره الظلت ثلث تيام
ومن ذاك النزف صار التراب بكربلا لين
عدا جفوف الكمر عباس ..
ماذب رايته وثنين اديه ذبهن
عدا سوط الشمر حرك ثنايا حسين
مدري شجاوبنه وبالعجل سدهن
عدا عيون الفواطم من مشت للشام
عين على التراب وعين تربى لجسد والدهن
عدا السجاد فوك النوك
واديه من السناسل ظل ينز دمهن
لـ كاظم اسماعيل الكاطع
وعدا قصيده الكاطع الظلم فخر القصايده كلهن
ردحذفوعدا قصيدة الكاطع الظلت فخر القصايده كلهن
ردحذف